Straumkrisa: Kraftkrevjande industri fryktar at dei skal miste konkurransefortrinn

Den kraftkrevjande industrien fryktar at straumkrisa skal ta frå dei eit viktig konkurransefortrinn overfor utlandet. Dersom dei høge straumprisane held fram, kan det få store konsekvensar for industrien, varslar dei.

— Om prisane stig til europeisk nivå, vil det vere mykje betre å ha smelteverka i andre land som er nærmare kundane og har lågare lønskostnadar, seier Alexander Strøm Arnesen, direktør for kraftinnkjøp i Elkem til Nationen.

Onsdag la NHO-foreininga Norsk Industri fram konjunkturrapporten sin. Den stadfestar at industribedriftene reknar med lågare lønsemd framover og er urolege for framtida.

— Industrien er i ei krise. Berre styresmaktene kan gjere noko med det akkurat no, seier administrerande direktør i Norsk Industri, Stein Lier-Hansen, til NRK.

Foreininga krev mellom anna at kraftgarantiordninga blir utvida til alle bedrifter med meir enn 10 GW forbruk, at fleire bedrifter får tilgang på langsiktige straumavtalar og at nye industrietableringar blir sikra gode straumavtalar

Etterlyser signal

Alexander Strøm Arnesen i Elkem seier det er viktig at styresmaktene no signaliserer at dei framleis ynskjer metallindustri i Noreg. Han trur straumprisnivået kjem til å gå ned att på eit tidspunkt, men at det i seg sjølv ikkje kan redde industrien.

— Vi er avhengige av å ha ein skilnad i straumprisen mellom Noreg og resten av Europa, og det er jo her utanlandskablane kjem inn. Det hadde garantert vore høg straumpris utan dei siste to kablane til Tyskland og England òg, men dei forsterkar problemet. Dei forsterkar også prissmitteeffekten vi er opptekne av. Desto større overføringskapasitet vi får på straum mellom Noreg og Europa, desto likare vert prisane. Det gjer at vi mistar konkurransefordelen vår, seier han.

Fornybar nøkkel

Også hos aluminiumsprodusenten Norsk Hydro uroar dei høge straumprisane.

— Tilgang på rein, fornybar kraft til konkurransedyktige prisar har vore eit viktig konkurransefortrinn for norsk industri. Det er òg nøkkelen til å lykkast med det grøne skiftet, seier kommunikasjonsdirektør Maria Melfald Tveten til avisa.

— Gode, langsiktige kraftavtalar er ein berebjelke i vår aluminiumproduksjon. Vi er avhengige av jamn tilgang til fornybar kraft til internasjonalt konkurransedyktige prisar til aluminiumverksemda vår, og framover òg til produksjon av grønt hydrogen og batteri, seier ho.

Treng langsiktige løysingar

Kommunikasjonsdirektør Carsten Dybevig i Norske Skog poengterer overfor Nationen at dei ikkje automatisk kan belaste kundane med auka kostnader, sidan prisane blir sette i ein global marknad.

Han seier det er viktig at styresmaktene finn langvarige løysingar for å hindre at konkurransefortrinnet som norsk kraftkrevjande industri har hatt, forsvinn.

— Mange norske industribedrifter har i dag ei fraktulempe, som på ein eller annan måte må kompenserast gjennom at andre kostnader er lågare. Det har historisk vore lågare kraftprisar i Noreg samanlikna med konkurrentland i rundt 100 år, seier han.

(©NPK)