Koronaordningane for arbeidsledige, permitterte og frilansarar blir foreslått forlengde
Dei mellombelse reglane for dagpengar og kompensasjonsordninga for sjølvstendige og frilansarar blir forlengde ut februar neste år, opplyser regjeringa.
Ein usikker smittesituasjon og nye smitteverntiltak som vart varsla tysdag kveld, gjer det nødvendig å forlengje fleire ordningar, varslar regjeringa.
– Nye smitteverntiltak betyr ny uvisse for arbeidsmarknaden. Det er derfor nødvendig å forlengje ordningar slik at folk utan jobb eller oppdrag blir varetekne, seier arbeids- og inkluderingsminister Hadia Tajik (Ap).
Artikkelen held fram under annonsen.
Følgjande koronaordningar skulle gjelde ut januar, men blir no forlengde ut februar:
* Kompensasjonsordninga for sjølvstendig næringsdrivande og frilansarar
* Rett til dagpengar til ledige og permitterte, uavhengig av kor lenge dei har fått ytinga
* Perioden for AAP-mottakarar som er avklarte for arbeid
* Forhøgde dagpengesats på 80 prosent kompensasjon for den delen av dagpengane som er under 3 gonger grunnbeløpet
* Særreglane med dagpengar for lærlingar
* Ein ledig kan jobbe opp til 60 prosent av vanleg arbeidstid før dagpengane fell bort, mot normalt 50 prosent
