Helse Bergen vil ikkje følgje Bergens omikronreglar
Helse Bergen vil ikkje følgje dei nye koronareglane i Bergen som inneber at alle smitta frå 10. desember skal vurderast som omikronsmitta.
Etter kunngjeringa til byrådet torsdag må òg nærkontaktane til dei smitta i utgangspunktet vurderast som nærkontakt av smitta med omikronvarianten.
Dette inneber at alle som er nærkontaktar, må ti dagar i karantene. Dei kan teste seg ut av karantene etter negativ PCR-test på teststasjon på dag sju.
Artikkelen held fram under annonsen.
På eit beredskapsmøte fredag morgon vedtok likevel Helse Bergen at dei ikkje vil følgje dei nye reglane til kommunen, skriv Bergens Tidende og Bergensavisen.
– Vi har stor forståing for den krevjande situasjonen Bergen står i, og at dei gjer sine vurderingar. Det skal ikkje vi protestere på. Samtidig har vi ei sjølvstendig plikt til å bemanne tenestene våre på forsvarleg måte. Vi følgjer derfor den nasjonale covid-19-forskrifta når det gjelde smittesporing og karantene, seier fagdirektør Marta Ebbing.
Helse Bergen vil dermed gjere sjølvstendige vurderingar av om det kan vere delta- eller omikronvarianten når tilsette er smitta gjennom smittesporing og intervju.
– Vi vil gjere heilt konkrete vurderingar om det er grunn til å mistenkje omikron i kvart smittetilfelle hos våre tilsette. Førebels har vi ikkje haldepunkt for at det er veldig mykje omikronsmitte. Vi har ikkje fakta som tilseier det, seier Ebbing.
(©NPK)
