Innsleppsstopp og krav om bordservering på serveringsstader forsvinn

Frå og med laurdag 25. september klokka 16 blir kravet oppheva om bordservering på serveringsstader og innsleppsstoppen klokka 24.

Det kunngjorde regjeringa på pressekonferansen sin om koronasituasjonen fredag.

Dermed er det igjen duka for dansing på dansegolv og henging i baren for dei festglade, og utelivet kan igjen drive for fullt.

I meir enn eitt og eit halvt år har det vore innført avstandskrav for alle besøkjande på utestader og serveringsstader i Noreg. Dette har lagt strenge avgrensingar for talet på gjester gjennom heile pandemien.

Krav om bordservering har vore gjeldande sidan 1. juni i fjor, då også utestader som ikkje serverte mat, fekk opne igjen etter dei nasjonale reglane.

Utestader og serveringsstader har òg til tider vore under full nedstenging og med strenge avgrensingar i opningstider, både nasjonalt og lokalt.