11 smittetilfelle påviste – kommunen ber smitta om å varsla nærkontaktane

I alt er 46 smitta i Ullensvang fredag kveld. Smittesporing held fram i litt mindre omfang i helga, men held fram for fullt måndag.

Alle som er smitta, er definerte som nærkontaktar av andre smitta, melder ordførar Roald Aga Haug i ei pressemelding fredag kveld.

To av dei som fekk positivt svar fredag, hadde fått positive svar i ein snøggtest dagen før.

Ifylgje han vil kommunen berre kontakta dei smitta i helga. Måndag vert også nærkontaktar kartlagde og smittespora. Ordføraren oppmodar difor dei smitta sjølve om å varsla nærkontaktane med det same. Det vert etter kvart veldig mange av desse, konstaterer Haug.

Kommunen gjekk fredag kveld ut med informasjon om at det ikkje vert arbeidd med smittesporing i det heile teke i helga. Dette vart korrigert laurdag morgon. Då opplyste kommunen at dei smitta vert kontakta. Artikkelen vart difor endra 28. august klokka 09.08.