Stiller spørsmål om Vestland-tunnelane

Stortingsrepresentant Kjersti Toppe (Sp) stiller spørsmål om tunneltryggleiken på vegane i Vestland etter tre steinras på to dagar den siste tida.

På Stortinget sine nettsider kan ein lese at stortingsrepresentant Kjersti Toppe (Sp) har spurt samferdselsminister Knut Arild Hareide (KrF) om statsråden kan gjere greie for tunneltryggleiken på vegane i fylket.

Toppe spør vidare om statsråden er einig i Statens vegvesen si vurdering om at det ikkje er grunn til å endre vedlikehaldsrutinane. Ho ønskjer at Hareide kan gjere greie for tiltak som gjer tunneltryggleiken betre, inkludert varsling av andre naudetatar ved ulukker.

Stortingsrepresentanten begrunner spørsmålet i dei tre steinrasa som gjekk i Vestland fylke 29. og 30. juli. Ho understrekar at det overordna ansvaret for trafikktryggleik er politisk, og minner om at Samferdselsdepartementet allereie i 2016 fekk kritikk frå Riksrevisjonen om manglande tryggleiksforvaltning.

Avslutningsvis blir det bedt om ei oversikt over det arbeidet som blir gjort for å sikre tunneltryggleiken på vestlandet, og om statsråden meiner at rutinar for vedlikehaldsarbeid er gode nok i dag.