Fråfallet av utanlandske turistar skapar vanskar for norske hotell

Nordmenn har fylt opp norske hotell i fellesferien i mangel av utanlandske turistar. Det har gjort at hotella har greidd seg fint hittil i sommar, men dei ser mørkt på hausten om ikkje grensene opnar.

Berre fem prosent av gjestane på Hotel Union Geiranger i år er utanlandske, fortel daglei leiar- og eigar, Sindre Mjelva, til Nynorsk pressekontor.

– Det er snakk om eit hundretals besøkande frå utlandet. Vi har til vanleg eit anna volum gjennom heile året, men nordmenn kjem for det meste berre i juli.

Det er i hovudsak snakk om tyske turistar som har kome. Turistar frå Asia og USA, som er den viktigaste marknaden for hotellet, har ikkje vist seg.

Ned 91 prosent

Det var ein kraftig vekst i talet på norske overnattingar i juni i år, samanlikna med juni i fjor,

Tal frå overnattingsstatistikken syner at det var om lag 2,8 millionar overnattingar ved kommersielle overnattingsverksemder, ein auke på 18 prosent samanlikna med juni i fjor. Tala viser også det store fallet i utanlandske overnattingar.

– Utanlandske overnattingar fall med heile 91 prosent, medan norske overnattingar berre fall med 3,4 prosent samanlikna med rekordåret 2019, skriv SSB.

Kurs og konferansar

Mjelva seier det er avgjerande at kompensasjonsordninga held fram til våren 2022 og at det vil ha mykje å seie om regelen om éin meter avstand skal gjelde også i haust.

– Det store spørsmålet blir om ein-meteren forsvinn og vi kan få i gang kurs- og konferansar igjen, men det verkar som det sit langt inne. Det gir i alle fall store konsekvensar for dei som driv med kurs og konferansar

– Vi lever på nåde av kompensasjonsordning og bankar. Dei avgjer kor lenge vi klarar dette.

Travle dagar

– Det er mykje likt som i fjor. Sesongen byrjar roleg, og så eksploderer det i fellesferien. Nett no er det veldig travle dagar, seier Kvikne til Sogn Avis.

– Nordmenn reiser ikkje mykje i august, så me ventar at etterspurnaden minkar. Telefonen blir rolegare og rolegare.

Opne grenser

Nils Henrik Geitle ved De Historiske, ein hotellkjede med 66 hotell og 23 spisestadar i heile Noreg, fortel at det har vore ein auke på om lag 26 prosent besøkande totalt i sommar. 96 prosent av desse har vore nordmenn, medan berre fire prosent har vore turistar frå utlandet. I eit normalår er talet 60 prosent nordmenn og 40 prosent frå utlandet på sommaren.

– På lang sikt er dei utanlandske turistane viktige. Vi klarar oss fint på den norske marknaden om sommaren, men på sikt treng vi utanlandske. Spesielt hotella på Vestlandet og i Nord-Noreg er avhengige av utanlandske gjester, seier Geitle til Nynorsk pressekontor.

Det har byrja å kome bestillingar for august og september frå gjester frå Tyskland, Nederland og Danmark, men hotellet er framleis usikre på korleis hausten blir.

– Vi er godt fornøgde med sommaren så langt, men håpar grensene kan opnast på sikt.

(©NPK)