Forbyr open eld

Brannsjefen har innført totalforbod mot open eld i både Kvam og Ullensvang. Forbodet gjeld inntil vidare.

Det er dermed ikkje lovleg å tenna opp noka form for eld, bål, bålpanne, eingongsgrill eller kolgrill, korkje heime eller i skogen, ifylgje eit presseskriv frå leiar for brannførebyggjande arbeid i Kvam herad, Mette E. Vintertun.

Det er tillate å bruka gassgrill og elektrisk grill i eigen hage, så lenge ein er aktsam.

Årsaka til forbodet er riskoen for gras- og lyngbrann, samstundes som det er redusert kapasitet av til dømes skogbrannhelikopter på grunn av ein pågåande aksjon vest for Bergen.

Skulle det gå så langt at det vert forbod mot grilling i eigen hage, vil det koma spesifikk beskjed om dette frå brannsjefen. Han vil òg informera når totalforbodet vert oppheva.

Vedtaket er heimla i forskrift om brannførebygging.