Feriesenter i naud
60 prosent av gjestene til Hardanger Feriesenter AS er utanlandske. Difor fekk grensestenginga i fjor store konsekvensar for verksemda, heiter det i ein søknad til Kvam herad om 449.658 kroner frå koronakompensasjonsordninga.
Noko av tapet vart vege opp av ein auke i den norske trafikken på 45 prosent. Men ettersom ein god del kostnader er faste og ikkje kan endrast, og det er grenser for kor sterkt bemanninga kan reduserast, fekk feriesenteret store økonomiske utfordringar.
Artikkelen held fram under annonsen.
– Underbemanninga i 2020 førte til store slitasjar, skriv mellombels dagleg leiar Geirmund Nes i søknaden.
Han viser til at vedlikehald er utsett, noko som vil auka kostnadene. Kvam herad etterlyste nyleg søknad om tiltak som skal brannsikra campingplassen, i kjølvatnet av eit branntilsyn. Senteret har no bede om å få ein førehandskonferanse i samband med tiltaket.
– Ressursane våre er nedtappa. Det vil ikkje vera mogeleg eller forsvarleg å driva i 2021 på same vis, skriv Nes.
Kvam herad har fått tildelt 1.581.575 kroner av potten som staten har sett av til kompensasjon for tap som fylgje av pandemien. Heradsstyret skal fordela pengane.
