Digitalt fylkesting for ungdommar i Vestland
Denne helga blir Fylkesting for ungdom arrangert digitalt i Vestland. Over 100 deltakarar frå dei 43 kommunane i fylket skal delta.
– Eg vil oppmode ungdommen til å engasjere seg politisk. Det nyttar, seier Susanne Sørli Slettebakken, leiar av Vestland ungdomsutval, i ei pressemelding.
Fylkesting for ungdom er det øvste talerøyret for ungdom mellom 13 og 19 år i Vestland fylke. I helga har dei samling digitalt. Mellom fylkestinga er Vestland ungdomsutval arbeidsutvalet og det utøvande organet for ungdommen.
Artikkelen held fram under annonsen.
– Politikarane vedtek planar som vi unge skal leve gjennom. Planane gjeld for lang tid framover. Vi er ungdommens stemme og vil vere med på å skape vår eiga framtid. Som ungdomspolitikar blir vi høyrde og får vere med på å skape det samfunnet vi skal leve i, seier leiaren i pressemeldinga.
Slettebakken nemner saker som kjeldesortering, å betre kollektivtilbodet, og behovet for psykisk hjelp for ungdommen og folk i alle aldrar, i samband med den sosiale nedstenginga, som viktige saker dei engasjerer seg i.
– Det vart mykje skule heime under nedstenginga i fjor vår og noko i fjor haust. Det har tatt på å vere heime, vi blir einsame, og det er vanskeleg å lære. Men heldigvis har vi ikkje vore heime heile veka, men den vart delt med nokre dagar heime og nokre på skulen. Inntrykket er at elevane har lyst til å vere mest mogleg på skulen og ha minst mogleg skule heime, seier Slettebakken.
