Stenger treningssenter og forbyr arrangement
Éin ny er smitta i Ullensvang, og den engelske varianten er påvist. Kommunen tek grep.
Kommunen var i møte med Folkehelseinstituttet tidlegare i dag.
Dette er dei nye tiltaka, som gjeld frå klokka 18 tysdag:
Artikkelen held fram under annonsen.
• Treningssenter og symjehallar skal halda stengt.
• Museum, kino, teater og andre kultur- og underhaldningsstader skal halda stengt.
• Alle arrangement vert forbodne, både innandørs og utandørs. Det gjeld også religiøse samlingar.
Kan straffast
Den lokale forskrifta gjeld til og med klokka 18 6. april. Ho er vedteken av smittevernoverlege Steinar Jacobsen med heimel i smittevernlova. Forsettleg eller grovt aktlaust brot på tiltaka er straffbart.
Kommunen har dessutan påbod om munnbind på offentlege stader der det er vanskeleg å halda to meters avstand.
Kommunen tek ikkje på seg økonomisk ansvar som følge av tiltaka.
Engelsk variant
Ordførar Roald Aga Haug (Ap) skriv i ei pressemelding at éin ny person har fått påvist smitte tysdag. Totalt har 12 personar i fem klynger eller husstandar fått påvist smitte.
Tysdag vart også den britiske mutanten stadfesta å ha infisert éin av dei smitta. Det gjeld truleg også dei andre personane.
Artikkelen held fram under annonsen.
Eitt barn med påvist smitte er frakta til sjukehus for behandling.
Om lag 180 personar vert testa tysdag. Det er dobbelt så mange som i går.
Haug oppmodar alle i kommunen om å vera merksame på smittevernråda og den lokale forskrifta.
