Kan bruke slam frå oppdrettsanlegg i laksefôr
Mykje tyder på at larvane til den svarte soldatfluga, som blir brukt i laksefôr, kan fôrast opp på slam frå oppdrettsanlegg.
Larvane til soldatfluga er næringsrike og fungerer bra som insektmjøl i for til laks. Larvane har ei unik evne til å ta opp daudt organisk materiale, som matavfall eller plantar, og gjer det om til næringsrikt protein og feitt.
– Forsøka våre viser at larvane som blir produserte med slam frå oppdrettsanlegg blir rike på marine feittsyrer som EPA og DHA, i tillegg til mineral som jern, sink og selen, seier forskar Nina Liland i Havforskingsinstituttet.
Artikkelen held fram under annonsen.
Forskarane gjorde fire ulike fôringsforsøk der kyllingfôr vart bytt ut med slam utan at det gjekk ut over veksten til larvane. Dei fann ut at opptil 60 prosent av foret kunne bytast ut med slam, utan at det gjekk ut over veksten til larvane.
Det blir produsert store mengder slam i norske oppdrettsanlegg, og slammet består i hovudsak av ikkje ete laksefôr og avføring frå fiskane. Dette blir filtrert ut av vatnet i landbaserte anlegg.
Oppdrettsselskapa er pliktige til å samle opp og tørke slammet, som igjen blir brent opp som avfall eller blir brukt i biogassanlegg.
– Det å bruke slam i insektproduksjon er ei betre løysing dersom ein vil ta vare på dei verdfulle næringsstoffa i slammet, seier Nina Liland.
