Veg stengd etter ras

Klyvevegen i Fyksesund er stengd på grunn av ras.

Vegen opnar tidlegast att fredag, melder Kvam herad. I dag skal eit klatrelag granska rasområdet. Rydding av vegen kan gjerast på nokre timar, men skadar på vegen og trong for meir sikring kan krevja meir arbeid, melder heradet.

Frode Skaar, som bur i området, fortel at han truleg var den fyrste som oppdaga raset og melde frå til Kvam herad torsdag.

– Me som bur her, har venta på det. Det er berre flaks at det ikkje gjekk med liv. Det er litt ufyseleg, seier Skaar, som fortel at massane rasa frå eit godt stykke ovanfor vegen.

Han var torsdag ettermiddag i sving med båtskyss, ettersom mellom andre skuleelevane ikkje kunne passera rasstaden og koma seg heim.