Butikkane vert opne, men aktiviteten elles låg i Ullensvang

Smitteverntiltaka er stramma inn i Ullensvang. Kommunen har 45 i karantene og ventar på mange testsvar.

Det opplyser kommunen i ei pressemelding sundag. Ullensvang, saman med Eidfjord og Voss, har no dei nest strengaste tiltaka etter den nasjonale forskrifta. Også her gjeld tiltaka til og med sundag 14. februar.

Framleis er berre ein person påvist smitta i Ullensvang. Det skjedde fredag. Han sit i isolasjon.

— Det er ikkje meldt nye nærkontaktar sidan fredag og det er ikkje fleire mistenkjelege forhold sidan fredag, opplyser kommunen.

Skular og barnehagar er framleis opne, og har smittevernkrav på gult nivå. Vaksenopplæringa er på raudt nivå og skal ha heimeundervising.

Innbyggjarar som kan det, vert bedne om å ha heimekontor. Skjenkjestopp er innført. Aktivitetar for unge opp til 20 år held fram som normalt. Munnbind skal nyttast overalt der ein ikkje kan halda stor nok avstand. Unntaket er born under 12 år som vert skyssa til skulen.