Seks nye smitta – Norheimsund skule vert stengd
Elevane på Norheimsund skule vert sende heim.
Det tiande koronatilfellet vart påvist torsdag kveld. Fredag morgon vart det meldt om fem nye tilfelle.
No kunngjer Kvam herad at Norheimsund skule vert stengd, i første omgang til og med måndag 8. februar.
Artikkelen held fram under annonsen.
Heradet har ein sterk mistanke om smitte og ein uavklart situasjon rundt nærkontaktar ved skulen. Elevar som allereie er på skulen, som ikkje kan hentast, får bli fram til skuleslutt fredag.
Kriseleiinga i Kvam herad møttest i formiddag for å drøfta nye tiltak, opplyser Øyvind Strømmen, informasjonsrådgivar i Kvam herad.
Ordførar Torgeir Næss sit fredag ettermiddag i møte med dei andre kommunane i regionen og Folkehelseinstituttet for å drøfta den lokale smittesituasjonen.
Dei nye smitta er kjende nærkontaktar.
Det er dermed 15 kvemmingar som har fått påvist koronasmitte etter det nylege utbrotet i Hardanger. Minst fire av tilfella er av den britiske varianten.
132 personar vart testa torsdag, men Kvam herad får berre automatisk melding om positive prøveresultat. Det er difor uvisst kor mange svar ein ventar på.
