Betre sysselsetjing i Vestland på tampen av året

I desember 2020 var det vesentleg fleire utan arbeid i Vestland enn på same tid året før, men samtidig var det færre som stod utan arbeid enn då koronapandemien tok til i vår, viser førebelse tal.

– Det er så tidleg på året at det er ikkje statistikk for alt, men tala eg fekk frå Nav-direktøren i går, viser at det per desember var 3,6 prosent av arbeidsstokken på cirka 350.000 som var arbeidsledige. Det er ein god del høgare enn same månad i 2019, men langt lågare enn starten på pandemien i vår. Så alt i alt kan me seia at sysselsetjinga er relativt stabil dei siste månadene som me nett la bak oss, sa fylkesordførar Jon Askeland (Sp) på det digitale nyttårsmøtet til Vestland fylkeskommune tysdag.

Fylkesordføraren fortalde at arbeidsløysa er høgast i Bergen, Øygarden og i typiske reiselivskommunar som Eidfjord, Ulvik og Aurland.

– Arbeidsløysa er generelt låg utanom desse kommunane, sa Askeland.

Han fortalde at kommunane Fjaler, Solund, Årdal, Modalen og Sunnfjord alle har under ein prosent arbeidsløyse.

I tillegg til reiselivsbransjen er det flest utan arbeid innan servicenæringane, transportsektoren og enkelte industrigreiner.