Heimekontor kan gi skattesmell for tilsette med lang reiseveg

Mykje heimekontor i år kan slå ut på skatten for dei som vanlegvis har eit stort frådrag for arbeidsreiser.

– Dei som vanlegvis har daglege reiser av ei viss lengd til arbeidsstaden sin, som har fått frådrag tidlegare år, vil miste det viss dei berre jobbar heimanfrå i år. Viss dei ikkje har endra skattekortet frå det som låg inne før pandemien kom i mars, kan det bety at dei trekkjer for lite skatt, seier rådgivar Espen Øren i Simployer, tidlegare Infotjenester, til FriFagbevegelse.

Frådraget blir berekna ut ifrå ein kilometersats, og blir gitt uavhengig av reelle utgifter eller kva kommunikasjonsmiddel du bruker.

Satsane for 2020 er 1,56 kroner per kilometer opptil 50.000 kilometer, og 0,76 kroner mellom 50.000 og 75.000 kilometer. Eigenandelen, det såkalla botnfrådraget, er på 23.100 kroner.

Dersom talet på dagar og kilometer overstig botnfrådraget på 23.100 kroner, vil ein få det som er over denne summen, som eit frådrag på skatten.

Også dei som normalt får pendlarfrådrag, kan ha skatta for lite i år om dei ikkje har reist like mykje til pendlarstadene og ikkje har justert skattekortet.

(©NPK)