25 feilfrie år

Marit og Øyvind Hesvik frå Kysnes var mellom 40 mjølkeprodusentar som i år fekk tildelt Tine-utmerkinga Mjølkespannet.

For å få denne gjeve utmerkinga, må ein ha levert såkalla elitemjølk samanhengande i 25 år. Dette er mellom dei gjævaste utmerkingane ein mjølkeprodusent kan få.

Vanlegvis vert spannet høgtideleg overrekt på årsmøtet til Tine, men på grunn av koronaviruset var ikkje dette mogleg i år. Det var difor Folgefonn Produsentlag som fekk i oppgåve å dela ut prisen.

— Klart det er stort å få denne anerkjenninga for det ein gjer, seier Marit Hesvik.

Ho har drive garden sidan 1989, då overtok ho etter foreldra. I dag har ho ni kyr, noko som inneber både føremoner og ulemper. Det å ha så få dyr gjer at det kan gje store prosentvise utslag om berre éi ku vert sjuk. Det slit dei ikkje med dei som har mange dyr. Hesvik seier at alt ho leverer frå seg, skal vera av høgaste kvalitet.

— Det er mat me driv med, og då er det viktig at den er trygg og god, seier ho.