Plast frå rundballar står for 70 prosent av plastforureininga i norske elvar

Heile 70 prosent av all plast i norske lakseelver kjem frå rundballplast frå landbruket. Det viser ei ny undersøking frå Norwegian Research Centre (Norce).

Forskarane frå Norce har gjort ei kartlegging av plastførekomsten i 43 norske elvar på Vestlandet, og tala er klare.

– Vi har kartlagt mengdene og kjeldene til makroplast, altså synlege, store plastbitar, i 43 elvar tilsvarande 200 kilometer med elvestrekning langs heile Vestlandet frå Rogaland i sør til Møre og Romsdal i nord. Dette er den første systematiske kartlegginga av plast i elvar i Noreg, seier Gaute Velle, forskar i Norce miljø, i ei pressemelding.

I 21 av elvane registrerte forskarane totalt cirka 1.100 meter med folie frå rundballar fordelt på rundt 1.500 bitar. Forskarane fann tre gonger så mykje rundballplast som alle dei andre plastkategoriane dei såg på til saman.

(©NPK)