Utsleppa er blitt litt mindre i landbruket

Jordbruket står for nesten 9 prosent av dei samla norske klimagassutsleppa, men situasjonen er blitt betre.

Frå 2018 til 2019 kutta jordbruket 37,5 tusen tonn CO2-ekvivalentar, viser ein oversikt frå Statistisk sentralbyrå. Det svarar til eit kutt i klimagassutsleppa innanfor sektoren på 0,9 prosent.

I ein pressemelding omtalt i Nationen seier landbruks- og matminister Olaug Bollestad at nedgangen i klimagassutslepp innanfor jordbruk viser at landbrukspolitikken til regjeringa verkar.

– Dette er ei svært gledeleg utvikling. Å få redusert klimagassutsleppa har vore prioritert i jordbruksoppgjeret dei siste åra, seier ho.

Samla for heile landet var klimagassutsleppa i fjor på det lågaste nivået sidan 1993. Utsleppa frå jordbruket var på 4,4 millionar tonn CO2-ekvivalentar. Det svarar til 8,7 prosent av dei samla norske utsleppa.