Bedrifter ramma av innreisekarantene får støtte i ny krisepakke

Iselin Nybø (V) seier at regjeringa i krisepakken sin legg opp til ei ordning på 480 millionar til bedriftene som organiserer karanteneordningar sjølv.

Til VG opplyser næringsministeren at bedriftene som no er ramma av at utanlandsk arbeidskraft er sette i innreisekarantene, skal få støtte på 800 til 1.000 kroner dagen per tilsett for å kompensere for nokon av utgiftene som koronatiltaket medfører.

Frå før har staten allereie gått inn med ein god del midlar til karantenehotell. Justisminister Monica Mæland (H) sa måndag at eigendelen på karantenehotell for arbeidsgivarar er på 1.500 kroner døgnet.

– Dette er tiltak som er heilt nødvendige for at vi skal få og ha kontroll på koronasmitten. No stiller vi opp med pengar for å lempe litt på kostnadene, seier Nybø til avisa.

(©NPK)