Kyrkjerådsleiar med sterk kritikk av koronatiltak

Leiar for Kyrkjerådet, Kristin Gunleiksrud Raaum, reagerer sterkt på at kyrkjebenker ikkje blir rekna som fastmonterte sete og at det etter dei nye smittevernreglane difor ikkje er lov å samla meir enn 50 menneske i ei kyrkje.

– Vi er den største medlemsorganisasjonen i Noreg. At styresmaktene går inn for 200 i ein kinosal og 50 i ei kyrkje, heng ikkje på greip, seier kyrkjerådsleiaren til Vårt Land.

Gunleiksrud Raaum opplever dette som eit uttrykk for kyrkjegjengarar er mindre opptekne av smittevern enn andre og at kyrkja blir behandla som mindre viktig enn kulturlivet elles. Det vil kyrkjerådsleiaren ikkje finna seg i. Ho slår fast at Kyrkja kjem til å protestera tydeleg på det dei oppfattar som forskjellsbehandling av kulturliv og trussamfunn.

– Vi veit kor viktig det kan vera å koma inn i ei kyrkje i ei krevjande tid. No er det på tide at styresmaktene seier det same, seier ho.

Statssekretær i Helse- og omsorgsdepartementet, Maria Jahrmann Bjerke, seier til avisa at det ikkje har vore meininga at dei nye reglane skulle vera diskriminerande. Grunnen til at det er lov å samla 200 i ein kinosal heng saman med at kinoar har fastmonterte sete, medan dei fleste kyrkjer har benker der folk kan flytta seg.

Dette er ifylgje Bjerke bakgrunnen for at Helsedirektoratet og Folkeinstituttet meiner uttrykket «fastmonterte sete» må tolkast strengt med tanke på den alvorlege smittesituasjonen landet er i.