Musegift fører til kattepine

Det er ikkje ufarleg for ein katt å fanga mus. I alle fall ikkje når musa er full av musegift.

Når det er museår, slik det er i år, kan musejakta vera risikabel. Berre dei siste par vekene har Kvam veterinærkontor AS måtta ta hand om fleire forgifta kattar, fortel veterinær Pernille Djupesland.

Nokre typar muse- og rottegift inneheld stoffet alfakloralose. Stoffet fungerer ved at det bedøver musa slik at den ikkje klarar å regulera kroppstemperaturen. Resultatet er at dyra frys i hel.

– Dei som har teke kontakt med oss, har hatt kattar som heilt brått har verka rusa. Dei har byrja sjangla og fått krampar i muskulaturen, seier Djupesland.

Kan vera dødeleg

Det er gjerne unge kattar som vert råka.

– Unge kattar er glupske, har høg jaktlyst og tek gjerne fleire mus i slengen. Dersom musa i tillegg er forgifta og slapp, er den lett å fanga, seier Djupesland.

Kattane Kvam veterinærkontor har behandla, har kvikna til etter nokre dagar. I verste fall kan alfakloralose ta livet av ein katt.

– Det finst ikkje motgift. Det einaste me kan gjera, er å behandla symptoma. Den siste katten me hadde inne, vart behandla både med krampestillande medisinar og veskedrypp. Dei som slit med mus, bør vurdera å bruka feller i staden for gift, seier Djupesland.

– Etterspurnaden er enorm

I butikken til Gules Mek og Landbruksverkstad AS, har etterspurnaden etter produkt mot mus vore langt større enn vanleg.

– Me har selt fleire gonger så mange slike produkt som i fjor. Hos oss er det feller med gift som er mest populært. Tradisjonelle musefeller er det færre som kjøper, fortel butikkmedarbeidar Einar Flatebø.

I giftfellene er gifta plassert slik at musa må krypa inn i eit lite hol for å få tak i den. På den måten skal ein unngå at andre dyr forsyner seg. Feller med gift må plasserast ute for å unngå at musa døyr inne og vert liggjande og lukta.

Ulovleg stoff

8. mai vart det forbode å selja musegift med alfakloralose til privatpersonar i Noreg. Det er òg ulovleg for privatpersonar å bruka stoffet, skriv seksjonsleiar Trine-Lise Torgersen i seksjon for biocid og kjemikaliedeklarering i Miljødirektoratet i ein e-post. Ho presiserer at det framleis er lov for autoriserte skadedyrverksemder å bruka gifta.

Hos Gules kjem denne meldinga som ei overrasking.

– Me har snakka med vår leverandør, som hevda at desse giftfellene er lovlege, seier driftsleiar Harald Bruhjell.

Etter meir kommunikasjon med leverandøren kjem det fram at Gules har fått feil feller.

– Me skulle hatt ein annan type feller med eit verkestoff som er lovleg. Fellene er no fjerna frå hyllene våre og sende i retur, seier Bruhjell.