Kvammaveko må avlysa endå ein gong
For andre gong vert Kvammaveko råka av koronaviruset. Men den tinga maten vil arrangørane gle folk med.
I slutten av september vart fleire store arrangement utsette til komande helg og veke. I går avgjorde arbeidsgruppa at dei utsette arrangementa må droppast, etter at statsminister Erna Solberg (H) i går oppmoda folk om å unngå sosial kontakt.
– Det er vanskeleg å invitera når statsministeren seier «hald dykk heime», seier Sidsel Haugen i arbeidsgruppa og Grannehjelpa.
Artikkelen held fram under annonsen.
Aktivitetsdagen i Øystese sundag vert avlyst, men maten er allereie tinga. Arrangørane vil difor stå i Norheimsund og Øystese mellom klokka 11.30 og 13.30 og dela ut såkalla wraps og Kvikk-Lunsj til det er tomt.
– Det er lov å ta familien ut på tur. Då må ein gjerne koma innom og henta proviant, seier Haugen, som minner om avstandsreglane og oppmodar folk om å ikkje flokka seg.
Føredraget med Pia Ve Dahlen måndag vert utsett til Kvammaveko neste år, etter at ho sa at det var greitt. Ho skulle også delta på aktivitetsdagen sundag og i ein sofasamtale med lokale krefter etter føredraget, men alt vert altså utsett. Dessutan vert Trakk og snakk onsdag droppa.
Lyspunktet er at føredraget med forfattar Tore Renberg, som var planlagt i Kvammaveko tidlegare i haust, vert sett opp att i januar – om alt går som det skal.
Haugen seier at også dei faste aktivitetane til Grannehjelpa vert sette på pause, i fyrste omgang i november. Grannehjelpa arbeider med å finna alternative, digitale møtestader.
Kvam herad opplyste torsdag følgjande på heimesida:
– Regjeringa har lagt til fleire tiltak som kommunar i bu- og arbeidsregionar med stort smittetrykk bør vurdera å innføra. Smittesituasjonen i Kvam tilseier ikkje at nokon av desse vert innført lokalt i skrivande stund.
