57 nye smitta i Bergen – varslar lokale tiltak frå neste veke

57 personar har fått påvist koronasmitte i Bergen det siste døgnet. Talet er det høgste som er registrert frå ein dag til ein annan sidan utbrotet starta.

Det opplyste byrådsleiar Roger Valhammer (Ap) på ein pressekonferanse fredag.

Over halvparten av dei smitta er mellom 20 og 29 år. Fire har ukjend smitteveg, og tre er importsmitte.

– Dagens smittetal er det høgste vi har rapport frå ein dag til ein annan. Eg er veldig bekymra for den vidare utviklinga i Bergen, seier Valhammer.

Smittesporinga viser at mange smittetilfelle er knytte til vorspiel, fest og besøk, men også til nokre utestader.

Totalt er det registrert 1.816 koronasmitta personar i Bergen sidan 28. februar.

Varslar nye tiltak frå neste veke

Valhammer varslar innføring av ei ny lokal forskrift tidleg neste veke. Dei vil bruke dei neste dagane til å vurdere tiltaka forskrifta skal innehalde, men varsla allereie fredag to tiltak som vil komme.

Det vil bli krav om gjesteliste på alle serveringsstader, også på stader utan alkoholservering.

I dag er den nasjonale tilrådinga at det kan vere maksimalt 20 personar i private samanhengar. I den lokale forskrifta vil dette bli redusert til ti personar i Bergen.

– I det vi går inn i helga vil eg vere tydeleg på at begge desse tiltaka er å sjå på som ei sterk tilråding frå og med i dag, sjølv om forskrifta enno ikkje er vedteken, seier Valhammer.

Smittevernkontoret vil i større grad vurdere å setje alle som har vore til stades same kveld, til dømes på ein utestad, i karantene.

Valhammer seier vidare at det vil vere fleire kontrollar på utestader i helga, og at stader som ikkje overheld smittevernreglane, risikerer å bli stengde.

Strammar inn på sjukeheimar

Det blir òg innstrammingar i besøksreglane på sjukeheimar og helseinstitusjonar.

– Vi er urolege over at smitten vil spreie seg blant dei mest sårbare blant oss, seier helsebyråd Beate Husa (KrF).

Pårørande eller andre besøkjande som dei siste ti dagane har vore på reise i utlandet, kan ikkje komme på besøk før ti dagar etter heimkomst.

– Så må ein for all del ikkje komme på besøk viss ein har forkjølingssymptom, seier Husa.

Kommunen innfører òg munnbind på sjukeheimar og i heimetenesta i situasjonar der ein ikkje kan halde éin meters avstand.

(©NPK)