Skianlegg fortviler over vedlikehaldsstøtta frå regjeringa

Skianlegga fortviler over at lovnaden om koronastøtte til vedlikehald frå staten ikkje har nådd opp til forventningane.

Tal frå Innovasjon Noreg viser at utbetalingane til alpinanlegga er på litt over 10 millionar kroner av søkte 88 millionar, skriv NRK Møre og Romsdal.

Dette er trass i at regjeringa sette av 250 millionar kroner i sommar til å finansiere vedlikehald av alpinanlegg og underhaldningsparkar etter tapte inntekter for bransjane.

Ordninga skulle sikre at anlegga fekk pengar til å gjennomføre lovpålagd vedlikehald, slik dei skulle vere klare til å ta i mot gjester neste sesong.

Alpinanleggenes Landsforening ønsker at myndigheitene endrar kompensasjonsordninga slik at anlegga får nødvendig hjelp.

– Dette er ei næring i krise på lik linje med resten av reiselivet. Vi er heilt avhengige av at myndigheitene forstår alvoret, og følgjer opp det dei har lova, seier generalsekretær i Alpinanleggenes Landsforening, Camilla Sylling Clausen, til NRK.

(©NPK)