Vidaregåande skular tener millionar på lakseoppdrett
Langs heile kysten finst det vidaregåande skular som tener godt på oppdrett. Arbeidarpartiet er kritiske til ordninga.
13 skular i Noreg er tildelt undervisningskonsesjon for oppdrett av laks og aure. Ein laksekonsesjon er eit løyve til å drive med oppdrett av laks, som skulane leiger ut til andre oppdrettarar.
Ein av desse skulane er Måløy vidaregåande skule. Skulen fekk konsesjon i 2017, noko som har gitt dei 12,5 millionar kroner i inntekter.
Artikkelen held fram under annonsen.
– Det er vinn-vinn situasjon. Vi og heile næringa i regionen har fordelar av det, seier Mona Bakke Svarstad, prosjektleiar for akvakulturutdanninga ved Måløy vidaregåande skule til NRK.
Næringspolitisk talsmann i Arbeidarpartiet, Terje Aasland, er kritisk til at nokre aktørar kan tene store summar gjennom ordninga.
– Det vi ser er at det blir veldig store verdiar konsentrert om nokre skular og oppdrettarar. Vi vil ha ein gjennomgang av ordninga for å sikre at dette kjem heile undervisningssektoren til gode, seier han til NRK.
