Havbrukskommunane er nøgde med statsbudsjettet

Regjeringa foreslår i statsbudsjettet for neste år å innføre ei produksjonsavgift i havbruksnæringa. Avgifta vil bli utbetalt til havbrukskommunar og -fylkeskommunar gjennom Havbruksfondet.

– Vi er godt nøgde med at produksjonsavgifta blir innført til neste år. Dette sikrar stabile og føreseielege inntekter til vertskommunane for oppdrett, og er eit godt supplement til det kommunane forventar å få frå framtidige sal av auka produksjonskapasitet, seier styreleiar Ole L. Haugen i Nettverk fjord- og kystkommunar i ei pressemelding.

Nærings- og fiskeridepartementet slår fast at formålet med denne avgifta er at kommunar som stiller areal til disposisjon for havbruksnæringa, skal oppleve positive ringverknader frå aktiviteten.

– I sum forventar vi kort og godt at dette skal gi meir til kommunane enn det vi erfart til no, og ikkje mindre, held Haugen fram.

Avgifta blir foreslått lagt på talet på kilo produsert fisk, med 40 øre per kilo sløgd fisk, det vil seie bløgga fisk utan innvolar og med hovud. Ei produksjonsavgift på 40 øre per kilo sløgd fisk blir rekna å gi eit utbytte på om lag 500 millionar kroner, som blir utbetalt i 2022.