Jon Fosses Melancholia II klar for turne

Framsyninga Melancholia II basert på romanen til Jon Fosse, er no klar for Stord, Bergen, Trondheim og Oslo, etter ein utseld urpremiere i Stavanger.

Romanen Melancholia I-II handlar om kunstnaren Lars Hertervig (1830–1902), målaren av lyset. Handlinga i romanen går føre seg i Stavanger i 1902. Lars Hertevig er død, men vi blir kjend med han gjennom minna og tankestraumen til hovudpersonen, den fiktive søstera til Lars.

No har Oda Radoor dramatisert romanen for scenekunstkompaniet Ymist, og framsyninga hadde urpremiere og fullt hus i Stavanger. No er det klart for vidare turne.

Ymist er koreograf og regissør Erlend Samnøen og skodespelar Morten Espeland. Tidlegare har dei også laga framsyning av EDDA/­Voluspå (2015) og Draumkvedet (2018).

Om Melancholia II skriv produsenten at romanen er eit trippelportrett. Det er både eit portrett av Oline og eit portrett av Lars, og det er eit portrett av skrivaren sjølv, forfattaren bak romanen. Han gir seg til kjenne i måten å sjå på, og gjennom rytmen og pusten i teksten. Skodespelaren vil gjennom eit koreografert fysisk språk forsøka å gestalta denne språkrytmen. På denne måten ser skodespelaren på skrivaren, som ser på Oline, som igjen ser på broren Lars, kunstnaren.

Speleplan:

4. oktober Stord kulturhus, 7.–8. oktober Cornerteatret, Bergen, 16.–17. oktober Rosendal Teater, Trondheim, 21.–25. oktober Vega Scene, Oslo