Algesopp i bringebæråker
Mattilsynet skriv til ein bonde i Kvam at det er påvist raud rotròte i ein prøve av bringebærsorten Glen Ample. Smitten kjem fram i ein analyserapport frå Norsk Institutt for Bioøkonomi (NIBIO).
Raud rotròte er ein algesopp som angrip bringebær og hybridar av bringebær. Sjukdomen kan spreia seg med planter, vatn, jord, fottøy, maskiner og reiskapar. Skadegjeraren har kvilesporer som kan leva i jord utan vertsplanter i meir enn 15 år.
Artikkelen held fram under annonsen.
Mattilsynet minner om at det er lov å driva bærproduksjon av bringebær på smitta område, men forbode å omsetja planter og formeiringsmaterial, unnateke frø, av bringebær frå smitta produksjonsstad.
Mattilsynet reknar ein produksjonsstad som smitta av raud rotròte i minimum 15 år etter at produksjonen av bringebær er avslutta.
Tilsynet tilrår at for å hindra spreiing av algesoppen, bør ein mellom anna reingjera reiskapar grundig etter bruk på smitta område før dei vert nytta på ikkje smitta område.
