Svært få kommunar har søkt om kjøkkenpengar

Berre 25 av 100 millionar kroner er førebels brukt til å byggje nye kjøkken og kantiner på norske sjukeheimar i år.

Mange sjukeheimar får levert mat frå store produksjonskjøkken, men regjeringa vil at fleire sjukeheimar lagar mat på eige kjøkken.

Derfor vart ei ny tilskotsordning oppretta i 2019. I år har Husbanken nesten 100 millionar kroner som kan fordelast til kommunar som vil bygge kjøkken på eksisterande sjukeheimar og omsorgssenter.

Førebels står 75 millionar ubrukt og kan søkjast på dei tre neste månadene.

– Viss ein har prosjekt, så spring og kjøp. Det er gode moglegheiter for å få pengar, seier Georg Vesterhus, regiondirektør i Husbanken til NRK.

Husbanken har så langt gitt pengar til kjøkken i Lillestrøm, Vindafjord og på Voss. I tillegg er det levert søknad frå endå ein kommune.

Vesterhus trur koronapandemien med nedstenging og strenge smitteverntiltak er noko av årsaka til at så få har søkt om tilskot i år.

(©NPK)