Hareide varslar store endringar i NTP-strukturen

Knut Arild Hareide varslar store endringar i kommande Nasjonal transportplan. – Den største endringa blir måten vi planlegg på, seier ministeren.

Ytringa kom under eit frukostseminar i regi av Samferdsledepartementet måndag. Temaet for seminaret var endringar i måten vi planlegg og prioriterer på i norsk samferdslepolitikk. Aktørar frå næringsliv og myndigheiter heldt innlegg for å belyse temaet.

Finn tre feil med Jesus

Under seminaret peika Hareide på at vi til no har bygd for stykkevis og for delt og viste til ei rekke spørsmål som det er naturleg å stille i arbeidet med kommande NTP.

– Spørsmåla er om vi prioriterer det viktigaste først, om vi går for dei rette løysingane, om vi brukar teknologien slik vi bør og får inn entreprenørane tidleg nok, spurde Hareide og svarte sjølv at det var fleire eksempel på at ein får til dette, men at det òg skortar på det i fleire tilfelle.

Ministeren var klar på at ein til no har hatt ein sedvane der alle vegprosjekt som blir godkjende politisk, blir gjennomførte. Han kom i samband med det med ei oppfordring til seminardeltakarane.

– Kan de komme på eit vegprosjekt der ideen er kommen for så seinare å bli lagt heilt bort? Det er nesten som å finne tre feil med Jesus. Det er ikkje enkelt, sa ministeren.

Store endringar

– Det vi må få til framover, er lågare kostnader og høgare nytte. NTP-en som kjem neste år vil innehalde store endringar, sa Hareide.

– Den største endringa framover blir måten vi tenker planar på. Vi skal ikkje lenger lage forventingar om at bestemte prosjekt skal komme på bestemte tidspunkt langt fram i tid, men vi skal vente til vi ser kva løysingar som er dei mest ideelle, sa ministeren.

Han viste til at det i kommande NTP vil vere ei todeling mellom dei seks første åra i planen og dei seks siste.

– Vi skal levere konkrete prosjekt dei første seks åra og så skal vi ha større transportkorridorar inn i planen dei siste seks åra.

Politikarane må gi bort makt

Ministeren trur endringane vil få fram blanda reaksjonar.

– Det handlar om at politikarane må tørre å sleppe litt opp og la fagfolk bestemme meir. På kort sikt gir politikarane frå seg litt makt og detaljstyring, men eg trur at om vi vel dette systemet så får vi som politisk myndigheit på sikt større myndigheit til å styre.

Det grunngav han med at ein til no i stor grad har vore bunden av å følgje opp vedtak som har vore gjort langt tilbake i tid. Hareide peika vidare på at det kan komme til å bli rabalder når endringane trer i kraft.

– Utfordringane er at alle fylke vil at vi skal levere på inneverande NTP og samstundes kjem dei med ei rekke ønske for ting dei vil ha i tillegg. Hadde eg hatt den høgaste økonomiske ramma, hadde eg trengt ni år på å levere første seksårsperioden i NTP. Hadde eg hatt den lågaste ramma, hadde eg trengt tolv år. Det inneber at nokon kjem til å bli skuffa, sa Knut Arild Hareide.