Rundt 100 protestar mot forslaget om å gi kommunane fritt flaggval

Forslaget om å opne opp for andre flagg enn det norske og samiske på kommunale flaggstenger har medført protestar frå rundt 100 privatpersonar.

Avisa Dagen skriv at det er rundt 100 privatpersonar som har meldt motstand mot regjeringsforslaget om å la kommunane velje flagg sjølv. Regjeringa har særleg trekt fram ønske om å bruke regnbogeflagget, som fleire kommunar allereie har flagga med, som grunn til å endre flagglova.

– Vi har ein identitet, og han ligg i det norske flagget. Eg ønskjer ikkje å vatne ut det, seier Arvid Solheim i Kristiansand, ein av privatpersonane som har meldt sin motstand.

Høyringsfristen for forslaget går ut måndag neste veke. Etter dagens reglar må det arrangerast eit eige arrangement fysisk i rådhuset for å kunne flagge med til dømes regnbogeflagget.

– Vi er ein av veldig mange kommunar som har valt å heise regnbogeflagget og ikkje bry oss om å følgje lova. Vi ønskjer no at det blir gjort ei endring, seier Kristiansand-ordførar Jan Oddvar Skisland (Ap).

(©NPK)