Kan bli ein god jaktsesong for rype

I enkelte fjellområde i Sør-Norge kan det bli eit svært godt rypeår. Men det er også store variasjonar, viser takseringsresultat frå fjellstyra.

– Hausten ser slett ikkje verst ut for dei som vil jakte på statsallmenningane, seier Torgeir Lande i Norges Fjellstyresamband i ei pressemelding.

Unntaket er Vestlandet, der det ikkje ser like bra ut i år.

I august kvart år blir det taksert, ved hjelp av ståande fuglehundar, ryper og skogsfugl langs førehandsdefinerte takseringslinjer over heile landet. I Hønsefuglportalen blir det aller meste av informasjonen lagra og registrert.

– Takseringa gir eit kunnskapsgrunnlag for korleis rypa kan forvaltast under jakta, for eksempel ved å skrive ut kvotar for maksimalt uttak per jeger. Det er etter kvart blitt vanleg for jegerane å ta omsyn til dags- eller sesongkvotar. Slik sikrar den ansvarlege rettshavar at uttak ikkje er overskrid fuglebestanden si bereevne, og jegeren kan jakte i tryggleik om at han eller ho ikkje utgjer nokon trussel for bestanden, seier Eldar Berli, generalsekretær i Norges Jeger- og Fiskerforbund.