Sju av ti støttar skjenkjestopp etter midnatt
71 prosent av dei spurde i ei Opinion-undersøking støttar vedtaket om å innføre full skjenkjestopp i heile landet etter midnatt.
Det viser Norsk koronamonitor, som har spurt 1.490 nordmenn om kva dei synest om vedtaket regjeringa gjorde 7. august om å innføre skjenkjestopp etter midnatt i heile landet.
18 prosent støttar ikkje vedtaket, medan 11 prosent er uvisse. Støtta til skjenkjestopp etter midnatt er sterkast i Midt-Noreg (74 prosent), følgd av Austlandet og Vestlandet. Minst oppslutning har avgjerda i Agder, Vestfold og Telemark (64 prosent). 70 prosent støttar vedtaket i hovudstaden.
Artikkelen held fram under annonsen.
Når det gjeld aldersfordeling, støttar 64 prosent av dei spurde under 30 år innstramminga, medan heile 79 prosent av dei spurde over 60 gjer det. Fleire kvinner (74 prosent) enn menn (68 prosent) støttar avgjerda.
– Uansett alder støttar folk flest skjenkjestopp, og dette gjeld òg dei yngre og såkalla unge vaksne, som har fått mykje motbør i det siste for festing, seier seniorrådgivar Nora Clausen i Opinion.
(©NPK)
