Bønder med pantekampanje for å unngå metallrestar i dyrefôret

Med informasjonskampanjen «Pant boksen» ønskjer Norges Bondelag å gjere folk meir bevisste på kva som faktisk kan skje dersom ein slengjer frå seg brus- og ølboksar i naturen.

Søppel som blir kasta i naturen, kan hamne inn i landbruksmaskiner og i verste fall inn i grasfôret og slik påføre dyr store lidingar før dei, i dei fleste tilfelle, må avlivast.

Nestleiar i Norges Bondelag, Bjørn Gimming, syns det er synd at folk slengjer frå seg søppel utan å tenkje over følgjene.

– Eg trur folk ville tenkt seg om ein ekstra gong om dei visste kva det faktisk kunne føre til. Det håper vi dei vil gjere etter å ha sett kampanjen vår.

Kampanjen vil kombinere deling av plakatar i sosiale medium med fysiske plakatar som blir hengde opp på rasteplassar og i butikkar over heile landet.

– Vi veit at mange skal feriere i Noreg i år, og eg er bekymra for at fleire brus- og ølboksar blir kasta i naturen. Ta med søpla heim. Viss ikkje, kan det ta livet av dyra våre, seier landbruks- og matminister Olaug Bollestad, som støttar kampanjen til bøndene.

Landbruket får kvart år inn historier frå bønder over heile landet som fortel om dyr som døyr på grunn av at dei har fått i seg delar av brus- og ølboksar gjennom fôret.

Bønder skal ha rutinar og system for å forhindre at slike ulykker skjer, men det er svært vanskeleg å fange opp alt. Brus- og ølboksane er lette og fyk ut på jorda. Deretter hamnar dei i graset. Når bonden haustar graset, blir aluminiumsboksane kutta opp i små bitar. Dermed hamnar små, skarpe bitar inne i fôret som dyra et.

– Det er viktig at bønder gjer det dei kan, men det er dessverre ikkje nok, seier Bollestad i ei pressemelding og meiner det viktigaste tiltaket for å unngå at husdyr blir skadde og døyr er at alle brukar hovudet og ikkje lar søppel og tomme drikkeboksar bli liggjande igjen ute i naturen, åker eller eng. Dette gjeld heile året, men særleg no i sommar.