Noregs einaste bokbåt vert lagd ned
Fylkestinget i Vestland fylke har vedteke å leggje ned bokbåten «Epos», som er landets einaste flytande bibliotek, melder NRK.
Bokbåten har i fleire tiår tøffa rundt i dei tre vestlandsfylka Sogn og Fjordane, Møre og Romsdal og Hordaland. I dei to førstnemnde fylka vart tilbodet avvikla i høvesvis 2015 og 2019.
Etter vårsesongen 2020 vert tilbodet avslutta i Vestland fylke. Det vedtok fleirtalspartia Ap, SV, Sp, KrF, Venstre og MDG på fylkestingsmøtet på tysdag.
Artikkelen held fram under annonsen.
Mellom årsakene til nedlegginga er trong økonomi i det nye fylket, ifølgje NRK. Fylkesrådmann Rune Haugsdal har òg argumentert for at om ein held oppe tilbodet, må det dekke heile fylket, ha universell utforming og ha utsleppsfrie eller lågutsleppsløysingar på plass, noko som vil gi ekstra kostnader.
Bokbåten har ofte vore nedleggingstrua, noko som kvar gong har ført til stor mobilisering for å unngå at båten blir sett på land. Også denne gongen er fleire forfattarar kritiske.
– Dette er ein tragisk dag for heile Vestlandet. Å leggje ned bokbåten er ein kulturpolitisk skandale, elendig distriktspolitikk og dårleg barnepolitikk, seier krimforfattar Gunnar Staalesen til kanalen.
(©NPK)
