Alge gjer Hardangerfjorden grøn-turkis
Ein ufarleg alge fargar for tida Hardangerfjorden grøn og gjer fjorden synleg frå verdsrommet.
Det er kalkalgen Emiliania Huxleyi som no blomstrar, slik han ofte gjer om våren, fortel Havforskingsinstituttet på nettsidene sine.
Den eincella mikroskopiske planten har ei overflate som er dekka av små kalkplater. Når sollyset blir reflektert frå desse, får sjøen ein karakteristisk turkis farge.
Artikkelen held fram under annonsen.
Emiliania huxleyi er ein ufarleg mikroalge både for folk og fisk, sjølv om han dannar store, og svært synlege blomstringar.
– Det einaste farlege kan vere redusert sikt for båtfolket. Fiskarar rapporterer også at det blir mindre fisk å få. Det kan henge saman med at også fisken får redusert sikt til å finne bytte, forklarar planktonforskar Lars-Johan Naustvoll.
Emiliania huxleyi er vanlegast i periodar med varmt vatn og rolege vindforhold. I fjor var det Sognefjorden som hadde den kraftigaste oppblomstringa her i landet.
