Nytt visingssenter er klart
Måndag kan folk for første gong vitja visingssenteret Lingalaks AS har laga til i Hardangerbadet.
Det fortel dagleg leiar i Hardanger Akvasenter AS, Sebastian Bjørnsønn Ludvigsen. Utstillinga er interaktiv og skulle i utgangspunktet ha vore sjølvbetent, open for alle og gratis. Koronaviruset gjer at det ikkje vert slik den første tida, sjølv om dette vert fortløpande vurdert. I mai og juni slepper ein i utgangspunktet berre inn dersom ein har førehandsbestilt.
– På grunn av smittefaren ønskjer me ikkje at senteret skal stå ope no. No slepper me berre folk inn i utstillinga når ho er bemanna. Kundane må bestilla, slik at me kan sørgja for at det er folk der når dei vil koma, seier Ludvigsen.
Artikkelen held fram under annonsen.
I juli og august skal senteret ha faste opningstider, men senteret vil framleis vera bemanna. Det er planlagt ribbturar til visingsanlegget i Fyksesund. Dette er førebels sett på vent.
Fortel om fjorden og næringa
Det vert inga markering av opninga måndag.
– Me skulle eigentleg ha ei offisiell markering tidlegare i vår, men ho er flytta til seinare. Det vert ikkje aktivitet i senteret måndag, med mindre det kjem inn ei bestilling, seier Ludvigsen.
Ludvigsen fortel at utstillinga i det meir enn 130 kvadratmeter store senteret handlar om Hardangerfjorden. Utstillinga syner korleis økosystemet i fjorden fungerer og legg til rette for fiskeoppdrett.
– Me har ein tredimensjonal modell av heile fjordsystemet, der ein mellom anna kan sjå havstraumane i fjorden og korleis dei påverkar heile fjordsystemet. Me har laga ein interaktiv gjennomgang av heile livssyklusen til laksen. Gjestene vil òg finna informasjon om historia til oppdrettsnæringa i Hardanger og om korleis Lingalaks driv i dag, seier han.
Gjestene forsvann
Ludvigsen fortel at interessa for visingssenteret har vore stor. Om lag 12.000 personar hadde førehandsbestilt plass på senteret. Dei aller fleste var utlendingar, og dei aller fleste er avlyste på grunn av viruset.
– I år håpar me at folk i Hardanger og tilreisande kundar skal vitja senteret. Sjølv om me reknar med at det kjem mange utanlandske gjester, er senteret først og fremst laga for å visa nordmenn korleis oppdrettsnæringa fungerer, seier han.
Ludvigsen fortel at ei av årsakene til at ein bygde visingssenteret, er at visingsanlegget i Fyksesund ikkje hadde kapasitet til å ta imot alle gjestene.
Artikkelen held fram under annonsen.
– I fjor måtte me avvisa om lag 30 prosent av alle som ville vitja anlegget, på grunn av plassmangel. Senteret i Hardangerbadet vil gje oss langt større kapasitet, fortel han.
