Mann (52) frå Norheimsund omkom i båtulukke – var truleg på veg heim

Klokka 02.23 natt til sundag vart politiet varsla om at eit ektepar frå Norheimsund hadde køyrt i land på øya Vesla-Sild aust for Varaldsøy i Kvinnherad. Den 52 år gamle mannen døydde på sjukehuset klokka 08.10 sundag morgon. Han etterlèt seg vaksne born.

Ekteparet var truleg på veg heim frå eit besøk, fortel lensmann Sigurd Børve i Kvinnherad lensmannsdistrikt.

Då meldinga kom, vart luftambulanse og eit Seaking redningshelikopter frå Sola sende ut, i tillegg til ein ambulansebåt frå Sunde med politi. Også andre lokale ressursar deltok.

Kvinna som varsla, låg i sjøen og klamra seg til land, medan mannen hennar låg medvitslaus i båten. Dei vart plukka opp av vatnet klokka 03.07. Mannen vart frakta direkte til Haukeland universitetssjukehus med luftambulanse. Kvinna vart teken om bord i ambulansebåten til Helse Fonna, og vart seinare frakta med helikopter til Haukeland.

Av helsemessige årsaker hadde politiet måndag føremiddag enno ikkje avhøyrt kvinna, som vert rekna som det mest sentrale vitnet. Politiet kan ikkje konkludera med kven som køyrde båten eller kvifor han trefte land. Det vert teke blodprøvar.

Politiet går ikkje ut med namnet på den omkomne mannen før det er avklara med familien, inkludert kvinna.

Kvinnherad lensmannskontor etterforskar saka. Måndag er politiet på staden for å fotografera og føreta målingar. Politiet skal òg undersøka båten, moglegvis med bistand frå fagpersonell for å henta ut elektroniske data.

Politiet har avhøyrt fire vitne. Vitna var på staden etter ulukka, eller var i kontakt med ekteparet i forkant. Politiet er på jakt etter fleire vitne som har registrert noko unormalt i løpet av natta, eller som har informasjon om reisa til ekteparet. Dei vert oppmoda om å kontakta politiet i Kvinnherad eller i Kvam.