Ber om talerett
Kvam ungdomsråd ber om endringar i retningslinene til heradsstyret.
Rådet ber om ei revidering av retningslinene til formannskapet og heradsstyret som gir medlemene i ungdomsrådet møte- og talerett.
Det vedtok rådet samrøystes tysdag.
Artikkelen held fram under annonsen.
Sander Eide Aase fortalde at han har snakka med ungdom frå andre kommunar som har gode erfaringar med ein slik praksis.
– Eg trur dette kan hjelpa oss til å få utretta meir. Me vert kanskje tekne meir seriøst, sa Eusebiu Amanalchioai.
Gaute Øymo Mælen er samd.
– Meininga med ungdomsrådet er at me skal kunna påverka, sa han.
Jasmin Golis trur talerett kan gjera arbeidet til ungdomsrådet meir synleg. Karina Amalie Vistvik trur det vil gjera at engasjementet kring rådet aukar, og at fleire vender seg til medlemene om dei har noko på hjartet.
Tre medlemer skal erstattast i år. Rådet vil vitja alle skulane i Kvam etter sommarferien for å informera ungdommane og gjera dei medvitne om arbeidet til rådet.
