Forbrukarrådet: Forbode å ta gebyr for legetime på video

Forbrukarrådet applauderer at størsteparten av fastlegane no tilbyr legetime på video for å redusere smittefare. Men dei minner om at desse konsultasjonane er frie for fakturagebyr.

For litt over eitt år sidan kunne ein få videokonsultasjon hos 8 prosent av fastlegane i landet. No kan ein få time på video hos nesten alle fastlegane. Det meiner Forbrukarrådet er bra. Men dei ser at nokre av legane ulovleg tar fakturagebyr for desse timane.

– Det som ikkje er greitt, er at nokon tar eit eige fakturagebyr for dette. Det har dei rett og slett ikkje lov til, og det er klinkande klart i regelverket, seier Anne Kristin Vie, fagdirektør i Forbrukarrådet i ei pressemelding.

Fleire pasientar har tatt kontakt med Forbrukarrådet fordi dei har fått gebyr på opp til 70 kroner på ein videokonsultasjon. Det kan bli betydelege summar for pasientar som nyttar helsevesenet ofte.

Gebyr er berre er tillatt dersom pasienten har ønskt å betale med faktura, og har valt bort å betale med kontantar eller i terminal. Når legekontoret av smittevernomsyn ønskjer at legetimen skal gå føre seg over video, har ikkje pasienten tatt det valet, skriv Forbrukarrådet.