– Det vert heilt trygt å byrja i barnehagen

Det forsikrar leiar for barnehage og skule i Kvam, Beate Gauden.

– Helsestyresmaktene har konkludert med at risikoen er liten for smitte frå barn til barn. Gode, smitteførebyggjande tiltak kombinerte med at sjuke born og tilsette held seg heime, vil gjera at dette vert heilt trygt. Borna har halde fram med å gå på skule og barnehage i Finland, Sverige, og på Island. Dei har ikkje hatt smitteutbrot i skular og barnehagar, seier Gauden.

Gradvis opptrapping

Den etterlyste rettleiinga frå styresmaktene vart lagd fram onsdag. Allereie måndag skal borna koma. Då HF snakka med Gauden onsdag ettermiddag, var ikkje alle detaljane i samband med opninga på plass. Det som var klart, var at kommunen vil satsa på ei gradvis opning av barnehagane.

– Alle skal ikkje koma måndag. Kven som skal koma først, er førebels ikkje bestemt. Det at me trappar gradvis, opp gjer dette tryggare. Sidan mykje er nytt, må me bruka tid på å laga nye vanar for borna, seier Gauden.

Sjølv om folk vert oppmoda om å halda avstand, kjem det framleis til å vera kroppskontakt mellom dei tilsette og borna i barnehagane.

– Dei tilsette og borna skal ikkje halda to meters avstand. Born som ønskjer ein klem, kjem ikkje til å verta avviste. Ingen vert hindra i å klatra opp i eit fang. Ein kan gje mange kroppsklemmar utan å vera kinn mot kinn, seier Gauden.

Mykje utetid

I rettleiaren vert det tilrådd at ein har tre born under tre år per vaksen, og seks eldre born per vaksen. I gruppene kan borna ha normal kontakt, men gruppene bør ha minst mogleg kontakt med kvarandre. For å følgja råda, reknar Gauden med at fleire barnehagar vil ha redusert opningstid og at meir av aktiviteten vil verta utandørs.

– Truleg vil ein mykje større del av dagen vera ute, for å unngå at det vert for mange personar inne samstundes. Henting og levering bør også i størst mogleg grad skje ute, slik at foreldra ikkje kjem inn i barnehagane, seier ho.

Eit av råda i rettleiinga er at sjuke born og vaksne skal halda seg heime. Dette gjeld også småsjuke born.

– Ein kan nok ikkje halda heime alle born som snufsar litt, men terskelen for å halda born heime skal vera mykje lågare enn det som er vanleg. Er foreldra usikre, må dei kontakta lege, seier Gauden.

Blanda reaksjonar

Hilde Bjørke er varamedlem i samarbeidsutvalet for Øystese barnehage. Hennar inntrykk er at foreldra reagerer ulikt på at barnehagane skal opna att.

– Nokre er klare for å levera borna frå seg, medan andre er meir skeptiske. Både mannen min og eg er lærarar og sjølve heime frå jobb. Me har berre eitt barn. Ho er halvtanna år. Me kjem truleg til å halda henne heime til å byrja med for å sjå korleis det går. Dei som har mange born og samstundes er i jobb, vil nok vera meir ivrige etter å levera borna frå seg, seier ho.

Det er faren for at borna skal smitta kvarandre og dra smitten med heim som er årsaka til skepsisen.

– Rådet frå styresmaktene er at me skal halda to meters avstand. Det kan ein ikkje seia til små born. Vår jente er glad i å klemma både vaksne og andre born. Sjølv om styresmaktene seier at born ikkje er ei stor smittekjelde, er framleis mykje usikkert, seier Bjørke.

Ho tykkjer litt synd på dei tilsette i barnehagane.

– Dei har fått veldig kort tid til å gjennomføra dette. Torsdag og fredag skal dei førebu seg, og måndag kjem borna. Eg trur mange born gler seg til å byrja i barnehagen att. Eg har i alle fall ei her heime som hadde hatt veldig godt av å sjå fleire på eigen alder, seier Bjørke.

Skulestart neste

Måndag 27. april skal elevane i 1. til 4. trinn attende i klasseromma. Ein ny rettleiar er venta i neste veke. Gauden seier at mange av tiltaka frå barnehagane truleg vert førte vidare til skulane.

– Det som skil skuleborn frå barnehageborn er at dei er eldre. Du kan seia til skuleborn at dei ikkje skal hoppa på kvarandre eller at dei skal vaska hendene ofte. Det er det ikkje så lett å seia til toåringar, seier Gauden.

Barnehageopninga vil gje erfaring ein kan ta med seg til skuleopninga.

– Me kjem til å læra ein del av dei erfaringane me gjer denne veka og får betre tid til å førebu oss før me opnar skulane, seier Gauden.

Ullensvang ventar

Ullensvang kommune har valt å utsetja barnehageopninga ei veke (sjå side 8) og opna både barnehagane og 1. til 4. trinn på skulane måndag 27. april.

Oppvekst- og utdanningssjef Morten Vevatne opplyser til HF at ein i kommunen er svært oppteken av at foreldre, born og tilsette skal vera trygge på at opninga skjer på ein forsvarleg måte. Rettleiaren vart tilgjengeleg først onsdag, og mange rutinar skal på plass i høve opninga. Ullensvang kommune har 13 barnehagar med ulik storleik og stor geografisk spreiing.

Summen av dette har gjort at kommunen har valt å utsetja opninga ei veke.