– Enkelte tek lett på bandtvangen

Frå 1. april byrja den generelle bandtvangen å gjelde over heile landet. Det vil seie at ein alltid må ha hunden i band når ein er utandørs. Men det finst hundeeigarar som tek litt lett på dette.

– Før trefte ein på enkeltpersonar som ikkje brydde seg, men no er det langt fleire som ikkje bryr seg. Dei tenkjer at hunden min gjer ikkje noko gale, for den er så snill. Men den har instinkt som blir løyst ut i enkelte situasjonar. Skjer det noko gale så er det gjort, seier tidlegare leiar i viltnemnda i Sarpsborg, Thor Pinaas (Ap), til Nationen.

Mellom 1. april og 20. august skal ein hund vere i band eller forsvarleg inngjerda eller innestengt. Det er fordi han ikkje skal jage eller skade andre dyr og fuglar.

Thor Pinaas trur den manglande respekten for bandtvangen handlar om at folk har mindre kontakt med naturen enn tidlegare.

– Naturen blir meir og meir fjern for det urbane mennesket, og det bekymrar meg. Vi byggjer ned naturen og tar frå viltet leveområdet i større grad, slik at dei blir lenger og lenger borte frå oss. Det syns eg er synd.

Pinaas understrekar at det også finst hundeeigarar som er flinke til å følgje bandtvangen.

(©NPK)