Lokale skianlegg kan opne, men dei fleste held stengt

Over 200 skianlegg måtte stengje då koronatiltaka sette inn for fullt. Ei slik stenging midt i høgsesongen har ifølgje Alpinanleggenes Landsforening gitt eit omsetjingstap på 400 millionar kroner.

No har Helsedirektoratet opna for at kommunelegen i kvar enkelt kommune kan bestemme om det lokale skianlegget kan opnast, med strenge smittevernstiltak. Eitt av skisentera som opnar til helga er Sogndal skisenter.

– Vi opnar i samråd med kommunelegen. Vi veit at folk i området er gira på eit fritidstilbod etter ein trasig månad. Vi ser det som eit samfunnsansvar å kunne gi folk det, i tråd med reglane om smittevern, seier Per Odd Grevsnes, dagleg leiar i skisenteret.

For lokalbefolkninga

Han fortel at dei er nøye i marknadsføringa med å gjere det klart at tilbodet er for lokalbefolkninga, som kan ta det som ein dagstur.

– Vi har ikkje kapasitet til å sjekke kor folk kjem frå. Men vi forventar at folk lyttar til myndigheitene sine råd om å droppe fritidsreiser og følgjer dei reglane som gjeld, seier Grevsnes.

Å opne skisenteret som eit tilbod til lokalbefolkninga, set framleis store krav til både tilsette og gjestene. Organisering av heiskø, toalett fasilitetar, parkering og beredskap med nødvendige smittevernstiltak gjer at skisenteret er avhengig av frivillige.

– Vi må ha ein stor dugnadsgjeng for å kunne gjennomføre dette, seier Grevsnes.

– Nesten så vi må tørke tårer

– Det har vore mange fine dagar med perfekte snøforhold. Då er det nesten slik at vi må tørke tårer over at vi må halde stengt. Vi har gått glipp av mykje inntekter og mange fine dagar på ski for lokalbefolkninga.

– Det er eit sjansespel å drive skisenter. Vi er heilt avhengige av mange utanforliggjande faktorar, legg han til.

Konsekvensane av å stengje skisenteret i høgsesongen er store. Med berre vintermånadene som inntektskjelde i løpet av eit år, er det vanskeleg for skisentera rundt om i landet å hente inn att inntektstapet. No håpar dei regjeringa forstår at det trengst tiltak.

– Kan kome konkursar

– Det har hatt enorme konsekvensar. Alpinanlegga var noko av det første som stengde ned, seier Camilla Sylling Clausen, generalsekretær i Alpinanleggenes Landsforeining til Nynorsk pressekontor. Deira oppgåve er blant anna å hjelpe alpinanlegga med råd og rettleiing.

– Det er tidleg å seie. Vi veit ikkje kor omfattande dette blir. Det kan kome konkursar og det blir krevjande for anlegga å kunne drive vedlikehald. Folk vil også få eit endra reisemønster, og mange av dei større destinasjonane lever av utanlandske gjester. Det er krevjande å skulle vite korleis dette vil utvikle seg, seier Clausen.

Kompensasjon

Sjølv om helsemyndigheitene no har opna for at kommunelegen kan bestemme om lokale skisenter kan opnast, trur ho ikkje det vil gi det store oppsvinget økonomisk for skisentera. Landsforeininga arbeider no med å sikre kompensasjon til sesongbedrifter.

– Det er berre nokre få skisenter som opnar. Av dei eg veit om hadde Alta opent i påsken, Hovden og Ål skisenter. Det er krevjande med så strenge tiltak, det spørst om det blir attraktivt å stå på ski med to meters avstand. For skisentera er det også ei kostnadsvurdering om det er vits i å hente inn tilsette og preppe løyper no.

Avhengig av kompensasjon frå regjeringa.

I Sogndal førebur dei seg på å gjere endringar i arbeidet som skulle gjerast til sommaren.

– Tapet av inntekt utfordrar oss på mange frontar. Skisentera har eit lovpålagt vedlikehald, der mange har etterslep, det gjeld også oss. Etter planen var dette noko vi skulle arbeide med i sommar. Vi er heilt avhengige av kompensasjon frå regjeringa.

Trass i inntektstapet, er leiaren for skisenteret optimistisk med tanke på neste sesong.

– Vi er optimistiske med tanke på å starte opp igjen til neste år, men vi må løyse nokre utfordringar. Denne krisa set oss tilbake i forhold til den utviklingskrafta vi kunne hatt.