Ope brev til alle partia på Stortinget og Landsorganisasjonen i Noreg (LO): Nei til konsesjon til utanlandskabel frå Sima til Skottland

I høyringsrunden for NorthConnect sin konsesjonssøknad om få byggje utanlandskabel, frå Sima i Eidfjord i Hardanger til Skottland, gjekk LO i Indre Hardanger sterkt imot at konsesjon vart gitt.

Det same gjorde eit stort fleirtal av dei som sende inn høyringsfråsegner innan fristen 10. mars.

Difor var det særs skuffande at Olje- og energidepartementet og statsråd Tina Bru (H), på vegner av regjeringa, den 25. mars likevel ikkje ville seie nei til denne konsesjonssøknaden no.

Ei utsetjing av saka i fleire år for å hauste erfaring med dei to kablane som no er under bygging, vil skape ein framleis usikker situasjon når det gjeld kraftprisar til både industrien og innbyggjarane i Noreg. Det var endå meir skuffande at fleirtalet i energi- og miljøkomiteen i si innstilling til Stortinget den 31. mars 2020 heller ikkje går inn for å avslå søknaden og stanse dette kabelprosjektet (sjå Innstilling 220 S 2019–2020).

Under den store kraftmønstringa framføre Stortinget den 9. mars i år støtta representantane for stortingsfleirtalet (d.v.s. representantane frå Ap, Sp, SV, Raudt og Frp) kravet om å seie nei til NorthConnect-søknaden. I innstillinga frå komiteen støttar ikkje Ap lenger dette kravet.

For den kraftforedlande industrien og industrisamfunna som er baserte på norsk kraft til norsk industri, er det mager trøyst at komitéfleirtalet går inn for at energilova skal bli endra for å sikre at Statnett skal få monopol på å eige og drifte alle framtidige utanlandskablar. Om Statnett overtek NorthConnect sin konsesjonssøknad for å byggje, eige og drifte denne utanlandskabelen frå Hardanger til Skottland om nokre år, vil det framleis vere katastrofalt for norsk kraftforedlande industri.

Vi krev difor at stortingsfleirtalet held fast ved sitt tidlegare standpunkt om å seie nei til denne utanlandskabelen, som vil medverke til endå høgare straumprisar for folk og industrien i Norge.

Vi krev at Arbeidarpartiet snur i denne saka i Stortinget den 21. april og medverkar til eit stortingsfleirtal som går inn for å seie nei til konsesjon, og be regjeringa skrinleggje for godt den planlagde utanlandskabelen frå Sima i Hardanger til Skottland.

Når korona-krisa er over, treng norsk kraftforedlande industri gunstige og trygge rammevilkår, og konkurransefortrinn, for å sikre arbeidsplassar og nye langsiktige investeringar i Norge.

Vi har ikkje råd til framleis tvil og rådløyse i fleire år om denne utanlandskabelen frå Hardanger skal byggjast.

Skrinlegg for godt utanlandskabelen frå Hardanger til Skottland no!

Odda, 14. april 2020

Styret i LO i Indre Hardanger

Terje Kollbotn (leiar)

Ørjan Andersson (sekretær)