– Glad for å koma i gang

Eit område på 120 mål på Skarpen like aust for Laupsa skal regulerast til næringsføremål med naudsynt infrastruktur. – Ei direkte oppfølging av arealdelen i kommuneplanen, seier prosjektleiar i heradet, Jon Nedkvitne.

Arbeidet med reguleringsplanen er nett starta og vert utført av ABO plan & arkitektur AS. Reguleringsplanen skal seia noko om korleis området skal tilretteleggjast og sjå ut når det er ferdig.

Området vil verta nytta av nokre verksemder i Øystese og eventuelt nyetablerarar. Det har vore mangel på attraktive næringsareal i bygdene.

For små og store

Skarpen-området vil eigna seg fyrst og fremst for entreprenørar og transportverksemder og liknande, opplyser Nedkvitne. Kor mange verksemder som vil halda til på Skarpen, vil vera avhengig av storleiken og korleis arealet vil verta sjåande ut.

– Me vonar det vil vera plass til både små og store verksemder og at arealet vert utnytta best mogleg, seier prosjektleiaren.

Det kan verta aktuelt med forskjellige hallar. Nedkvitne reknar med at enkelte verksemder vil flytta frå Evjo til Skarpen. På Evjo skal småbåthamna utvidast. I kommuneplanen heiter det òg at det på Evjo i Øystese kan tillatast utsal av bilar, båtar, landbruksmaskinar, trelast og større byggjevarer, og utsal frå hagesenter og større planteskular. Området skal ikkje nyttast til næring som fører til støy og støvplager for omgjevnadane, som til dømes entreprenørverksemd og lagring av grus og steinmassar.

Avkøyrsle og utforming

Mellom utfordringane på Skarpen er at ein må få ei god avkøyrsle til fylkesveg 79. Omgjevnadane må skånast for støy, og ein må få ei god utforming av landskapet. Dette vert teke hand om i reguleringsplanen.

Planprogrammet er på høyring.

– Me vil få ein del innspel når det gjeld kva utfordringar som skal utgreiast i konsekvensutgreiinga, seier Nedkvitne.

I konsekvensutgreiinga skal ein gå grundig igjennom ulike tema og sjå kva verknader dei har for planområdet. Så skal planen tilpassast til konsekvensutgreiinga. Sistnemnde er ein del av oppfølginga etter at ein har laga eit planprogram, og er eit grunnlag for sjølve reguleringsplanen.

Den primære tilgangen til området skal vera på land, men ein vil òg sjå på moglegheitene for å koma sjøvegen. Ein veit ikkje enno om det vil koma ein kai, men ein ynskjer å sjå om det er mogleg.

Området må planerast og tilretteleggjast og verta funksjonelt for at det skal kunna brukast på ein god måte, seier Nedkvitne. Konsekvensutgreiinga vil seia noko om korleis landskapet skal formast. Korleis det vil sjå ut, veit ein ikkje enno.

Ber om innspel

– Me er svært glade for å få i gang dette no. Det har lenge vore snakk om å skapa nye næringsareal både i Norheimsund og Øystese. Folk som har meiningar om prosjektet må sjølvsagt koma med innspel no i oppstartsfasen. Det er viktig at ein følgjer med på kunngjeringar, seier Nedkvitne.

Fristen for å uttala seg er 8. mai.

Etter fristen vil det verta utarbeidd eit planforslag som skal handsamast av Kvam herad. Planforslaget vert så lagt ut til offentleg ettersyn. Det vil då verta høve til å koma med innspel og merknader. Etter at perioden med offentleg ettersyn er avslutta vil ein gå gjennom innkomne innspel og merknader og eventuelt justera planforslaget før endeleg godkjenning.

Planområdet er i dag uregulert og er i kommuneplanen i hovudsak sett av til næringsverksemd. Mot sjøen er det eit belte som er sett av til framtidig grøntstruktur. Planområdet grensar i vest til areal sett av til bustader og grønstruktur. Her er det sett i gang eit privat reguleringsarbeid som har pågått i mange år.