Utdanningsforbundet bekymra for sosial forskjell ved heimeskule
Eksisterande sosiale forskjellar mellom elevar blir forsterka av heimeskule, meiner forskarane, som minner om at norsk skule skal jamne ut slike forskjellar.
Medan elevar i fellesskulen skal ha tilgang på like stor plass, same hjelpemiddel og utstyr, vil det varierer mykje kven og kva elevane har til rådvelde i heimeskulen sin, påpeikar fagfolk overfor Klassekampen.
– Barn av foreldre med høgare sosioøkonomisk bakgrunn klarer seg betre i skulen. No når skulen ikkje kan bidra, heng det endå meir på foreldra, seier Anna Cecilia Rapp, førsteamanuensis ved lærarutdanninga på NTNU.
Artikkelen held fram under annonsen.
– Bakgrunnen og involveringa til foreldra blir meir tydeleg no. Viss dette varer ut i tid, kan ein setje spørsmålsteikn ved det likeverdige opplæringstilbodet til elevane, seier leiar Steffen Handal i Utdanningsforbundet. Han er bekymra.
Professor Bodil Kleve ved lærarutdanninga på Oslomet har forska på korleis elevar med ulik sosioøkonomisk bakgrunn taklar klasseromssituasjonen og lærar matematikk.
– Det som skjer no, når barna skal vere heime og få digital undervisning, er at den forma for undervisning vil forsterke dei forskjellane som var der i utgangspunktet, seier ho.
(©NPK)
