Vil ha rett til å tala

Kvam ungdomsråd ønsker talerett i formannskaps- og heradsstyremøta.

– Me har representantar for heradsstyret i ungdomsrådsmøta som skal tala vår sak, men eg vil heller møta opp sjølv, slik at politikarane kan sjå kven me er og at me bryr oss, seier leiar i Kvam ungdomsråd, Håvard Botnen.

Han meiner det vil vera veldig positivt for arbeidet i ungdomsrådet.

Tysdag kveld vert temaet teke opp i eit digitalt møte i ungdomsrådet. Sander Eide Aase har sendt inn eit framlegg. Han skriv at retten hadde auka gjennomslagskrafta og gjort rådet meir synleg.

Engasjerte ungdommar

Dei rakk akkurat å samlast, ungdommane i ungdomsråda i heile Hardanger og Samnanger, før samfunnet vart stengt ned, Hardangerfjord Hotel stengde dørene og store forsamlingar vart forbode.

9. mars var det møte i Hardanger ungdomsting i Øystese.

Fylkestingsrepresentant Stian Jean Opedal Davies (Ap) snakka om ungdomsengasjement og korleis ein kan få gjennomslag, medan kvemming og statssekretær Grunde Kreken Almeland (V) snakka om psykisk helse i skulen.

– Det er fantastisk at me kan samla så mange engasjerte ungdommar på same plass. Me har mange ulike problem, og kan få løysingar og tips av kvarandre. Samstundes har me mange like utfordringar som me kan drøfta, seier Botnen.

Ungdommane jobba mellom anna i grupper med emna mobbing, digitalisering, psykisk helse og kollektivtilbod.

Viktig med tilbod

Også ordførarane i regionen var til stades og deltok i programmet. Botnen meiner det er viktig å ha god kontakt med makta.

– Her kan me skapa relasjonar i ein litt mindre seriøs samanheng med litt latter, seier han.

Botnen meiner det er viktig å gi ungdommar tilbodet om å engasjera seg i styre og stell.

– Mange ungdommar synest kanskje slikt er keisamt. Men når du kjem inn i det og får meir informasjon, ser du det på ein annan måte. Alle ungdommar har noko dei er irriterte over. Gjennom politikk kan du gjera noko med det, seier han.

Då Botnen var på toppmøte for born og unge i regi av KS, fekk han sjølv høyra ei historie frå ein ung ordførar som i utgangspunktet ikkje var interessert i politikk. Då ordføraren ville riva eit ungdomshus, byrja han å blanda seg inn. Nokre år seinare vart han sjølv ordførar.

– For veldig mange handlar det om å få høvet. Eg er oppteken av at ungdommen skal vita at Kvam ungdomsråd finst. Ein treng ikkje ha peiling på alt for å vera med. Du lærer mykje undervegs, seier han.

– Må vurdera talerett

Ordførar i Kvam, Torgeir Næss (Ap), meiner politikarane i Kvam er flinke til å inkludera ungdomsrådet. Han meiner ein må vurdera å gi rådet møte- og talerett i heradsstyret, sa han frå scena i ungdomstinget.

Samstundes bør partia vera flinkare til å engasjera dei unge og setta dei høgt på vallistene.

Roald Aga Haug (Ap), ordførar i Ullensvang, oppmoda ungdommane om å vera meir på hogget.

– Som ordførar er det mange som krev tida vår og masar på oss. De må vera frampå og hevda dykkar rett! Eg likar å verta pusta i nakken i viktige saker, og de kjem til å verta prioriterte om de krev tida mi, sa han.

Han synest det er givande å jobba med saker for ungdom, og etter å ha brukt dagen saman med ungdomsråda i Hardanger, hevda han at medlemene var langt over middels oppegåande.