Spør etter samlivskurs

Jostein Moldsvor i Kvam KrF spør rådmannen kva hjelp og førebygging heradet kan tilby fyrstegongsforeldre.

Kvart år opplever 20.000 born i Noreg samlivsbrot. Mange greier seg fint etterpå, men diverre ikkje alle. I statsbudsjettet for 2020 fekk KrF gjennomslag for 30 millionar kroner som skal brukast på samlivskurs for førstegongsforeldre.

– Er dette noko Kvam herad kjem til å koma i gang med i 2020? spør Moldsvor.

Ein veit ikkje kor mykje ressursar eit samlivsbrot kostar samfunnet. Men har paret det godt på heimebane, kan det bidra meir i både skule og arbeid enn om ein har samlivsproblem.

– Når ting byrjar røyna på, kan det vera god hjelp i verktøy og tips ein hugsar frå eit slikt kurs, skriv Moldsvor.

Ei av hovudsakene til KrF er familie, og der er samlivsrelasjonane viktige. Nokre gonger kan dette vera eit vanskeleg tema.

Moldsvor ser at familievernkontoret kan yta god hjelp, men i mange tilfelle kjem det for seint inn i biletet, når paret allereie har fått problem.

– Relasjonar er noko av det vanskelegaste i våre forhold. Ifølgje Gottman-instituttet, som forskar på familierelasjonar, seier to av tre par at forholdet har vorte dårlegare etter at dei fekk born, skriv KrF-representanten.

– Me ser for oss at i samband med at par vert fyrstegongsfødande, kan dei få tilbod om eit samlivskurs. Ikkje berre om fødselen, men om kva det gjer med parforholdet, seier heradsstyremedlemen.

– Me har ikkje tenkt så mykje på korleis det skal gjennomførast i praksis, men spør om det er noko som det går an å arbeida vidare med. Eg trur i alle fall at det er trong for noko slikt, seier Moldsvor.

Kva løyvinga tyder lokalt, har Moldsvor ikkje undersøkt.

– Kva er det som gjer at de føreslår dette?

– Det er at KrF er eit familieparti og at ikkje alle taklar å bli foreldre for fyrste gong. Det er ein del som slit med parforholdet etter at dei får det første barnet. Forelskingsfasen er over, og så kjem kvardagen, seier KrF-politikaren.